ინდური დილა – საზოგადოება "ინდურ სახლში"

19 ნოემბერს, საზოგადოება "ინდური სახლის" სარეპეტიციო დარბაზში ნამდვილი ინდური განწყობა იგრძნობოდა.
აქ ყველაფერი იყო: სურნელოვანი ჩხირების სურნელი, ინდური მუსიკა, ცოცხალი ყვავილების გირლიანდები, ფერადი სანთლები, ინდური ტკბილეული, ყავა, ჩაი... და კიდევ გამოფენილი ინდური კოსტუმები თუ უამრავი სხვა სიმბოლიკა რაც ინდოეთისა და მისი კულტურის მოყვარულებს თავს ცოტა ხნით სასურველ და საყვარელ გარემოში აგრძნობინებდა.
აქ იყვნენ საზოგადოება "ინდური სახლის" როგორც მასპინძლები, ასევე სტუმრები, ქართველებიც და ინდოელებიც.
მიზეზი ამ დილაადრიანი შეკრებისა იყო ის, რომ საზოგადოება "ინდური სახლი" ტელევიზიიდან ელოდებოდა სტუმრებს სიუჟეტის მოსამზადებლად.
საიტზე უკვე ავღნიშნე "ინდური სახლის" მცირე წარსულის შესახებ და დავწერე ისიც, რომ სულ რაღაც ერთი თვეა რაც "ინდურ სახლთან" თანამშრომლობს ქ–ნი თამარ კურდღელია.
შეიქმნა ინდური სიმღერისა და ცეკვის ჯგუფი, რომლის საფუძველზეც შემდეგ უნდა ჩამოყალიბდეს ანსამბლი.
გოგონები შეისწავლიან როგორც ინდურ კლასიკურ ცეკვას, ასევე თანამედროვე ცეკვებსაც ბოლივუდური ფილმებიდან.
ქ–ნ თამრიკოს, რომელიც ძირითადად კლასიკურ ცეკვას შეასწავლის გვერდით უდგანან ძველი "სიტარას" მოცეკვავეები. (ინდური კინოს მოყვარულებს კარგად ახსოვს ეს ანსამბლი, რომელიც კ/თ "ახმეტელში" ფუნქციონირებდა).
ამჯერად ქ–ნი თამარის თხოვნით (თამარ კურდღელიას კონტრაქტი აქვს ტ/კ "რუსთავი 2"–თან), "ინდური სახლი" დაუკავშირდა ტ/კ "რუსთავი 2"–ს დილის გადაცემას და შესთავაზა ერთ–ერთ გადაცემაში გაჟღერებულიყო "ინდური სახლის" შესახებ.
სტუმრებს "ინდური სახლის" ხელმძღვანელი, ქ–ნი რუსუდან თოდაძე და თამარ კურდღელია შეხვდნენ ინდური სახლის სხვა მასპინძლებთან ერთად.
შესრულდა საცეკვაო ნომრები ძველი კლასიკისა თუ თანამედროვე ბოლივუდური ფილმებიდან, რამდენიმე სიმღერა ჩვენი საყვარელი ფილმებიდან.
იყო საუბარი ბოლივუდზე და ქართულ–ბოლივუდურ ურთიერთობებზე.
სპეციალურად მოწვეულმა სტუმარმა ყველა მსურველს მოუხატა ხელები ხნით – ულამაზესი ფიგურებით და სურვილი გამოთქვა თანამშრომლობა გააგრძელოს ინდურ სახლთან.
სხვადასხვა ინდური სამოსით რამდენიმეჯერ შეიმოსა მშვენიერი კორესპოდენტი– ანი გიუნტერი, რომელსაც შემდგომ, პირად საუბარში შევატყვე რომ ინდოეთის და ინდური ფილმების მიმართ გულგრილი ნამდვილად არ იყო.
სტუმრებს "ინდური სახლისაგან" სახსოვრად გადაეცათ "ინდური სახლის" მიერ გამოცემული ჟურნალები და სხვადასხვა სუვენიერები.
სიუჟეტი სავარაუდოდ 22 ნოემბერს ტ/კ "რუსთავი 2"–ის დილის ეთერში გავა სამ ნაწილად, ხუთწუთიან სიუჟეტებად და გასვლის შემდეგ საიტებზეც დაიდება, თუმცა მანამდე გთავაზობთ ინდურ სახლში გადაღებულ ფოტოებს.

ინდური დილა – "ინდურ სახლში"


ნახეთ სიუჟეტი
პირველი ჩართვა

მეორე ჩართვა

მესამე ჩართვა

ინდური სახლის კიდევ ერთი სიურპრიზი ინდური კინოს მოყვარულებს

მას შემდეგ რაც ბათუმში ინდური საქონლის გამოფენა–გაყიდვის გახსნაზე ინდოეთის ელჩმა ნახა ქართველთა მიერ შესრულებული ინდური კლასიკური ცეკვების საკმაოდ დიდი მოცულობის პროგრამა და შეიტყო რა, რომ ეს პროგრამა ანსამბლის ხელმძღვანელმა თამრიკო კურდღელიამ საკუთარი ძალებით, საკუთარ სახლში მოამზადა, აღფრთოვანებული დარჩა და ქ–ნ თამრიკოსთან შეხვედრის მიზნით ის ოფიციალურ სადილზე მიიწვია.
თუმცა შეხვედრა ბათუმში ქართველ მოცეკვავეთა შეზღუდული დროის გამო ვერ მოხერხდა და მიუხედავად ელჩის დაპირებისა, რომ თბილისში ჩამოსვლისას აუცილებლად შეხვდებოდა მათ, ქართველი მოცეკვავეები მაინც სკეპტიკურად იყვნენ განწყობილნი ამ დაპირების მიმართ.
შეხვედრა შედგა.
თბილისში სტუმრად მყოფი ელჩი შეხვდა ბევრ ადამიანს ვინც საქართველოში ინდური კულტურის პოპულარიზაციითაა დაკავებული და მათ შორის ქ–ნ თამრიკო კურდღელიასაც.
ელჩმა მოისმინა ქ–ნ თამრიკოს სამომავლო გეგმების შესახებ და დახმარებასაც დაპირდა, იმ პირობით რომ ქართველ მოცეკვავეებს სარეპეტიციო დარბაზი უნდა ეპოვათ და რეპეტიციები გაეგრძელებინათ.
ღია ცის ქვეშ მყოფი მოცეკვავეები კომპანია "ინდურმა სახლმა" შეიფარა და სარეპეტიციოდ დარბაზი გამოუყო.
ინდური სახლის ხელმძღვანელი ქ–ნი რუსუდან თოდაძე ყველანაირად მხარში უდგას მოცეკვავეებს. "ინდურ სახლის" გარშემო სულ უფროდაუფრო მეტი ინდოეთისა და ინდური ხელოვნების მოყვარული იკრიბება.
მზადდება სპეციალურად ელჩის ჩამოსვლასთან დაკავშირებით საკონცერტო პროგრამა, რომელშიც ინდური სიმღერების შემსრულებელი ქართველი მომღერლებიც მიიღებენ მონაწილეობას.
პარალელურ რეჟიმში ხდება დარბაზის მოწყობაც ინდური გარემოს შესაქმნელად.
წარმატებებს ვუსურვებ ქართველ ინდური ხელოვნების მოყვარულთ და გთავაზობთ რამდენიმე ფოტოს, რომელიც სხვადასხვა დროს რეპეტიციებისას გადავიღე.

საერთაშორისო ფესტივალი კარავში და ქართველების მიერ წარმოდგენილი ინდური კლასიკური ცეკვები

სართაშორისო ფესტივალი კარავში სამი დღის განმავლობაში გრძელდებოდა და მასში მონაწილეობა მიიღო სხვადასხვა ქვეყნის (საქართველოს, შვედეთის, ესტონეთის და სხვ.) ცეკვისა და სიმღერის კოლექტივებმა თუ ცალკეულმა შემსრულებლებმა.
საქართველოდან ამ ფესტივალში მონაწილეობდა ქართული ქორეოგრაფიული ჯგუფები და სიმღერის ანსამბლები, პარკერის ჯგუფები.
საინტერესო იყო ის ფაქტი რომ ფესტივალზე ქართველი მოცეკვავეების მიერ ინდური ცეკვებიც იყო წარმოდგენილი.
კომპანია "ინდურ სახლთან" არსებულმა ინდური ცეკვის ანსამბლმა თამრიკო კურდღელიას ხელმძღვანელობით რამდენიმე ინდური კლასიკური ცეკვა წარმოადგინა და როგორც ქართველი, ასევე უცხოელი მაყურებლის დიდი მოწონება დაიმსახურა.

კომპანია "Bollartgeorgia"–ს პრეზენტაცია კ/თ ახმეტელში

ინდური კინოს მოყვარულთა დიდმა ნაწილმა, ვინც თვალს მუდმივად ადევნებს საქართველოში და კერძოდ თბილისში მიმდინარე მოვლენებს ინდოეთთან და კერძოდ ინდურ კინოსთან დაკავშირებით, იცის რომ რამდენიმე წლის წინ დაარსდა კომპანია "Bollartgeorgia", რომელიც საქართველო–ინდოეთის კულტურულ ურთიერთობათა ცენტრს წარმოადგენდა.
კომპანიის დამფუძნებლები იყვნენ დავით ბეჟიტაშვილი და რუსუდან თოდაძე. პრეზენტაცია გაიმართა კ/თ ახმეტელში, 2008 წლის 3 მაისს საინტერესო პროგრამით.